मा. जिल्हाधिकारी, नांदेड यांचा संदेश

श्री. राहुल कर्डिले (IAS)
जिल्हाधिकारी, नांदेड

नांदेड जिल्ह्यातील कृषी क्षेत्राला चालना देण्यासाठी शासनाच्या धोरणानुसार आयोजित करण्यात येणारा नांदेड कृषी महोत्सव हा शेतकरी, महिला बचत गट (SHG), कृषी उद्योजक आणि विविध कृषी संस्थांसाठी अत्यंत उपयुक्त असा उपक्रम आहे. या महोत्सवाच्या माध्यमातून आधुनिक कृषी तंत्रज्ञान, नाविन्यपूर्ण उपक्रम, तसेच विविध कृषी उत्पादने आणि प्रक्रिया उद्योग यांची माहिती शेतकऱ्यांपर्यंत पोहोचविण्याचे महत्त्वपूर्ण कार्य केले जात आहे.

कृषी महोत्सव हा केवळ तीन दिवसांचा प्रदर्शन कार्यक्रम नसून, शेतकरी, ग्राहक आणि उद्योजक यांच्यात थेट संवाद साधण्यासाठी तसेच ग्रामीण उत्पादनांना व्यापक बाजारपेठ मिळवून देण्यासाठी एक प्रभावी व्यासपीठ नक्कीच ठरेल.

याच पार्श्वभूमीवर, प्रदर्शनामध्ये सहभागी होणाऱ्या शेतकरी व महिला बचत गटांना दीर्घकालीन बाजारपेठ उपलब्ध व्हावी या उद्देशाने www.NandedKrushiMahotsav.in हे डिजिटल व्यासपीठ उपलब्ध करून देण्याचा उपक्रमही स्तुत्य आहे. या संकेतस्थळाच्या माध्यमातून शेतकरी व ग्रामीण उत्पादकांना त्यांच्या उत्पादनांची माहिती अधिक व्यापक स्तरावर पोहोचविता येईल आणि त्यांना नवीन बाजारपेठांशी जोडण्यास मदत होईल.

नांदेड जिल्ह्यातील शेतकरी, महिला बचत गट आणि कृषी उद्योजकांनी या कृषी महोत्सवात सक्रिय सहभाग नोंदवावा आणि उपलब्ध संधींचा लाभ घ्यावा, असे आवाहन करीत आहे. अशा उपक्रमांमुळे जिल्ह्यातील कृषी क्षेत्र अधिक सक्षम होईल आणि ग्रामीण अर्थव्यवस्थेला बळकटी मिळेल, असा मला विश्वास आहे.

सर्व संबंधित विभाग, संस्था आणि सहभागी यांना या उपक्रमासाठी मनःपूर्वक शुभेच्छा.